روشنی
(ایک نعتیہ نظم)
۔۔۔۔۔۔۔۔
روشنی آگہی، روشنی زندگی
وقت کی بے کراں بے کراں جھیل میں
وقت کی کہکشاں کہکشاں جھیل میں
علم و عرفان کی ابتدا روشنی
ابتدا روشنی ،انتہا روشنی
روشنی سے ہر اک سمت شانِ نمو
روشنی یم بہ یم، جو بہ جو، کو بہ کو
روشنی جستجو، روشنی آرزو
روشنی روشنی روشنی روشنی
یہ جہاں کچھ نہ تھا، یہ زمیں کچھ نہ تھی
اک خلا تھا یہاں
ذہن و دل کا کوئی رابطہ بھی نہ تھا
روشنی کا کوئی سلسلہ بھی نہ تھا
دفعتا'' پھر سویرا ہوا، روشنی ہنس پڑی
شاخِ گل جھک گئی، ہر کلی ہنس پڑی
چاند روشن ہوا، ظلمتیں چھٹ گئیں
راستے سج گئے، منزلیں مل گئیں
گل فشاں گل فشاں زندگی سج گئی
شب کے ماتھے پہ افشاں لیے چاندنی سج گئی
آپ آئے مسرت کے گل کھل گئے
آپ آئے بہاروں کے سب قافلے مل گئے
پھر صداقت کی شمعیں فروزاں ہوئیں
پھر ستاروں کی راہیں گل افشاں ہوئیں
علم و عرفان کے سب دیے جل گئے
راستے سج گئے، قافلے چل پڑے
۔۔۔۔۔۔۔۔۔۔۔۔۔۔۔۔۔
